वाराणसी यात्रे जाईन । प्रयाग तीर्थ पाहीन । varanashi yatre jain | prayag tirthe pahin

 वाराणसी यात्रे जाईन । प्रयाग तीर्थ पाहीन ।

त्रिवेणीय स्नान करीन । परी मी वीट नव्हेन ॥१॥

विठोबा पायींची वीट । मी कई बा होईन ॥२॥

गोदावरी यात्रे जाईन । बारा वरुषाचें फ़ळ लाहीन ।

अब्जक तीर्थी स्नान करीन । परी मी वीट नव्हेन ॥३॥

मल्लिकार्जुन यात्रे जाईन । श्रीशैल्य शिखर पाहीन ।

पाताळगंगे स्नान करीन । परी मी वीट नव्हेन ॥४॥

मातापुर यात्रे जाईन । सह्याद्री पर्वत पाहीन ।

गहनगंगे स्नान करीन । परी मी वीट नव्हेन ॥५॥

कोल्हापुरीं यात्रे जाईन । महालक्ष्मी पाहीन ।

विशाळ तीर्थी स्नान करीन । परी मी वीट नव्हेन ॥६॥

एका अंगुष्ठीं तप करीन । पृथ्वी पात्रचि लाहीन ।

देह कर्वतीं देईन । परी मी वीट नव्हेन ॥७॥

बहुता पुण्याच्या सायासीं । चरण जोडले विटेसी ।

निवृत्तिदासु म्हणे परियेसी । परी मी वीट नव्हेन ॥८॥